今年個冷天來得早也類得急，霜也朆大打，雪已經來哉。
一到大冷天，人就懶哉，賽過只煨灶貓。實梗冷漓漓個天，作興只有一碗菜飯，再會得讓人有勁道吧。
菜飯，顧名思義，就是菜搭飯個結合體。當然啦，蘇州人個菜飯弗單單有菜，有飯，還要放咸肉個，搿勒也叫咸肉菜飯。
菜 是菜飯個精華
伲用個是大菜，打過霜個大菜，也叫青菜。搭北方個統(tǒng)稱弗一樣，江南地區(qū)講著個“青菜”是一只品種菜，白菜個改良品種，古稱“菘”。
李時珍《本草綱目·菜一》里就有記載：“菘即今人呼為白菜者，有二種。一種莖圓厚微青，一種莖扁薄而白…”
莖圓厚微青個“菘”經過江南人個改良，就變成功仔現(xiàn)在生青碧綠個青菜哉。
燒菜飯，最好要用“矮腳青”，該個是本地青菜個一只品種。菜身矮，葉爿厚，包得緊，矮兜兜生生青，圓孛倫登個，搿勒叫俚“矮腳青”。
打過霜個“矮腳青”菜梗頭浪個肉頭厚實，顏色鮮澤，吃口好，滋味濃，蘇州人講“霜打個青菜賽羊肉”。
飯 是菜飯個靈魂
“白米飯”是江南人的主食，勒海六千年門前，蘇州人就已經種植食用粳稻哉，唯亭草鞋山遺址出土個炭化粳稻就是最好個證明。
稻米個品種也多，總個來講有粳，秈，糯三種。糯米大家儕曉得，黏性香軟，一般用來做糕團個；秈米吃口干硬，現(xiàn)在弗大常吃哉；而粳米味道香，吃口韌，是燒菜飯個不二選擇。
本地粳米吃口更加綿軟，弗易夾生，搿勒無不大鑊灶頭個城里人家燒菜飯，一般儕用本地粳米。有辰光為仔讓菜飯更加軟糯，也有人家會得鑲一滴滴糯米進去。
咸肉 是菜飯個點綴
蘇州人講“小雪鹽菜，大雪鹽肉”。肉，要用上好個五花肉，切成功三節(jié)頭闊個條狀，著仔鹽花均勻個搓勒肉浪，然后放勒缸里，壓好石頭鹽。
燒菜飯個咸肉弗能多，一般切成小丁，最好拖點壯肉，燒個辰光還能煸出點油，吃勒海更加肥篤篤。
豬油 是菜飯個秘方
一抄豬油一碗飯，再是蘇州人搭冷天廝守個原因。
豬油一般要用豬板油熬，用小火慢慢叫燒，熬到出油，水分全部蒸發(fā)，鑊子里個板油儕變成功黃顏色個油渣，就好撈出來哉。
實梗熬出來個豬油，乳白飽滿，晶瑩剔透，拌一抄勒菜飯里，吃得人滿嘴留香。
燒菜飯個辰光也要注意，咸肉、青菜要先勒鐵鑊子里鋍一鋍，然后再搭新米一淘進鍋燒。
剛出鍋個菜飯，每一粒米浪儕染仔青菜個色澤，著仔咸肉個咸鮮，蒸騰個熱氣下泛仔瑩潤個光。碧玉夾柔珠，間或胭脂紅，豬油一拌，更像著仔色一樣個鮮活起來，讓人食指大動。
老法頭蘇州人屋里儕有焐窠，焐窠焐出來個菜飯韌糾糾，肥篤篤，來得個好吃。假使勒鄉(xiāng)下頭個大灶頭浪燒，還有一層得底個飯?，就更加香哉。
立冬過后，新米收獲，大菜打霜，新雪初降辰光，弗來一碗菜飯嘗嘗？
文 | 予安
版 | 予安
聯(lián)系客服
